Жаңалықтар

*"Ұстаз" фильміне көрермен көзқарасы*

"Ұстаз" фильмі – тек мектеп өмірінің бейнесін ғана емес, қазіргі заманғы оқушы мен ұстаз арасындағы қарым-қатынасты, қоғамдағы өзекті мәселелерді шебер жеткізетін жүрекке жылы туынды. Фильмнің басты кейіпкері Ілияс – өз ісіне адал, білікті ұстаз. Ол туған ауылына қайтып келіп, үмітсіз деп есептелген 11-сынып оқушыларына білім беруге тырысады. Алайда, бұл тек математика сабағы емес, жастардың өмірін өзгертетін шынайы өмір сабақтары болып шығады.

Фильмнің мазмұны оқушылардың тек ҰБТ-дан өтудегі қиындықтарын ғана емес, олардың интернетке тәуелділігі, мамандық таңдау алдындағы сенімсіздік, ата-ана тарапынан қысым секілді өмірлік мәселелерін ашық көрсетеді. Сонымен қатар, ата-ананың бала өміріндегі рөлі, ұстаз бен оқушы арасындағы сенімнің маңыздылығы және жастардың өз күшіне сенуінің қаншалықты маңызды екендігі жақсы өрбітілген.

Ілиястың оқушыларға білім беру тәсілі – олардың өмірге деген көзқарасын өзгертуге, өз-өзіне сенімді болуға шақырады. Оның басты мақсаты – ҰБТ көрсеткіштерін жақсарту емес, жастарға өз өмірлерін жаңа қырынан көруге көмектесу. Бұл фильм ұстаздың рөлін тек білім беруші емес, рухани бағыттаушы ретінде көрсетеді.

Фильм эмоционалды әрі мотивацияға толы. Оқиғалар барысындағы шынайы кейіпкерлер мен өмірлік мәселелер көрерменді бірден баурап алады. Әсіресе, ауыл өмірінің суреттелуі мен жастардың армандары мен қиындықтары барынша түсінікті әрі жақын етіп жеткізілген.

"Ұстаз" – барша мұғалімдер мен оқушыларға, ата-аналарға арналған шынайы әрі ойландыратын туынды. Ол бізді өмірдегі басты құндылықтарды бағалауға, жастарға сенім артып, оларды қолдауға шақырады. Фильмді көріп шыққан соң, әркім өз жүрегінде бір жылулық пен мотивация сезінері анық.